Smiley face
Smiley face
Smiley face

ژنە ڕۆژنامەنووسێکی کورد تاوانەکانی دەوڵەتی تورک بە دۆکیۆمێنت دەکات

2018-05-06 08:12:52



ڕۆژنیوز - سەمیرا شەهابی

 

ژنێکی کورد بووەتە ڕۆژنامەنووسی جەنگ و لەبەرەکانی شەڕ و مانەوە لەگەڵ هێزی شەڕڤان و پێشمەرگەدا دەبێتە هۆیەک بۆ گواستنەوەی ڕاستییەکان و لەڕێگەی ئەرشیفیکردنی پاشماوەکانیشیانەوە، تاوانەکانی دووژمن بە دۆکیۆمێنت دەکات.

 

جەنگ، کارەساتێکە کە هیچ کات لە گەل و خاکمان دانابڕێت و دووژمنانی کورد بەردەوام چاویان لەسەر کوردستانە و لە هەوڵی داگیرکردنی دان، پارێزەرانی وڵاتیش چ گەریلا و شەڕڤان بێت یان پێشمەرگە بەخوێنی خۆیان لە دژی ئەو داگیرکارییانە وەستاونەتەوە، ڕۆژنامەنووسان و ڕاگەیاندنەکانیش وەک لایەنی سێیەم لەو جەنگانەدا ڕۆڵ دەگێڕن.

 

کاڵێ، یەکێکە لەو ڕۆژنامەنووسانەی، کە بەشداریی زۆربەی جەنگەکانی کردووە و ڕووماڵی پێشڕەوییەکانی پارێزەرانی گەل و نیشتیمانی کردووە و بە کامێراکەی دەستی هۆڤێنێتی دووژمنی نیشانی جیهان داوە.

 

 

کاڵێ ئەمین تەمەن ٢٧ساڵ و دانیشتووی شاری  سلێمانییە و  ماوەی ٦ ساڵە کاری ڕاگەیاندن دەکات و لە ئێستاشدا لە دەزگای پی یو کەی میدیا پەیامنێرە، کاری ڕاگەیاندن دەکات، لە دەستپێکی ئۆپەراسیۆنی موسڵ چووە بەرەکانی جەنگ و دواتر لە ١٦ی ئۆکتۆبەر لەکاتی هێرشی حەشدی شەعبی و سوپای عێراق بۆسەر کەرکوک بۆ ڕووماڵکردن چووە ئەو شارە، دوایین جاریش لەکاتی هێرشی دەوڵەتی تورکی داگیرکەر و چەتەکانی بۆ سەر عەفرین، خۆی گەیاندە ڕۆژئاوای وڵات و لەو ماوەیەی لەوێ بوو پێبەپێی شەڕڤانان ڕووماڵی ئەو جەنگەی کرد.

 

 

کاڵێ، زیاتر لە مانگێک لە عەفرین ماوەتەوە و وەک خۆی دەڵێت: چۆن ئێرە نیشتمانی منە بە هەمان شێوەش عەفرین نیشتیمانمە، ئەگەر حەزکردن و هەستی نەتەوایەتیم نەبووایە ئەوا نەمدەتوانی ئەو هەنگاوە بنێم.

 

 

 

ئەو ژنە ڕۆژنامەنووسە، لەو جەنگانەی، کە بەشداریی کردووە، کۆمەڵێک پاشماوەی دوژمنی وەک کتێب، چەک و دەفتەری نووسین و زۆر شتی دیکەی کردووە بە ئەرشیفێک و دەیەوێت لەداهاتوودا لە پێشەنگایەکدا نمایشی بکات، ئامانجیشی بەدۆکۆمێنتکردنی تاوانەکانی دووژمنە.

 

 

ئەو هێزی زۆری لە شەڕڤانان وەرگرتووە و سەبارەت بە جەنگی عەفرین و بەشداریی ژنان دەڵێت: شۆڕشی عەفرین  شۆڕشی ژنە، هەروەها جیاوازیشی لە گەڵ سەنگەرەکانی باشور لەوەدا بوو کە ژنان بە تایبەت یەپەژە هێزی سەرەکی بوون.

 

 

ڕاستیەکی حاشاهەڵنەگر هەیە، کە ئەویش کپ کردنی تواناکانی ژنە لە کۆمەڵگای کوردیدا، بۆ نەهێشتنی ئەم کپکردنانەش کاڵێ پێی وایە، کە دەبێت لە کۆمەڵگاکەماندا بەردەوام کەسێک هەبێت تا ببێتە ڕێگەخۆشکەر بۆ ئەوانی دیکە و ئەم زەمینەیەش تەنها بە ئیرادەی خودی ژنان دێتە کایەوە.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin