Smiley face
Smiley face
Smiley face

هاوڵاتییەک دارتاشییەکی جیاواز دەکات

2018-05-21 08:57:14



ڕۆژنیوز - هاوکار مستەفا

 

هاوڵاتییەکی دانیشتووی شارەدێی خورماڵ، ماوەی زیاتر لە ساڵێکە جیاواز لە دارتاشەکانی تر بە داری وشکی ناوخۆ، کەلوپەلی جیاواز دروست دەکات.

 

موئمین جەمال، دارتاشێکی دانیشتووی شارەدێی خورماڵ-ی سەر بە پارێزگای هەڵەبجەیە و ماوەی ساڵێکە بە سوود وەرگرتن لە دارە وشکەکانی باخ و گوندەکانی سنوری شارەدێی خورماڵ، توانیویەتی چەندین کەرەسەتە و کاڵای ناوماڵ و باخچەکان دروست بکات، کە جیاوازن لەو کاڵاو کەرەستانەی لە وڵاتانی ترەوە هاوردە دەکرێن، ئەمەش بووەتە جێگەی سەرنجی هاوڵاتیان و خواست لەسەر کەلوپەلەکانی زۆرە.

 

 

موئمین جەمال، خولیای کاری نوێ و جیاوازی هەیە، بۆیە لەجیاتی هێنانی دار و تەختە لە وڵاتانی بیانییەوە، دار و تەختەی سنوورەکەی خۆیان بەکار دەهێنێت و ئەو هونەرەی کاری دەستیی کە دەیزانێت لەسەریان دەینەخشێنێت.

 

ئەو دارانەی لە دروستکردنی کاڵاو کەرەستەکاندا بەکاریان دەهێنێت، پێکدێن لەداری گوێز، بەڕوو، سورە چنار هەندێک جاریش سود لە داری سنەوبەر وەردەگرێت، هەروەها ئەو کەرەستانەی کە دروستیان دەکات زۆرجار لەسەر خواستی هاوڵاتیانە، کە بریتین لە تەختی خەو، کورسیی و مێزی نان خواردن، پنە و قاپ و کەوچکی دار و چەندین کەرەستەی تری جوانکاریی ناوماڵ و باخچەکان.

 

 

ئەم کارەی موئمین بەبێ کۆسپ و گرفت تێناپەڕێت، چونکە دەستکەوتنی دارەکان بۆ کارەکەی هەروا ئاسان نییە، وەک خۆی دەڵێت: تەنها ئەو دارانە بەکار دەهێنێم کە وشک بوون یاخود خاوەن باخەکان گۆڕانکاریی لە باخەکانیان دەکەن و هەندێک لە دارەکانیان دەبڕنەوە، من بەهیچ شێوەیەک دارێک بەکارناهێنم، کە بزانم بە مەبەست بڕاوەتەوە و زیان بە ژینگە دەگەیەنێت.

 

 

لەڕووی نرخی کاڵا و شمەکانییەوە ئەو دارتاشە ئەوەی خستەڕوو، کە ئەو کەرەستانەی کە لەوڵاتانی دەرەوە هاوردە دەکرێن نرخەکانیان زۆر بەرزترە لەو کەرەستانەی کە ئەو دروستیان دەکات، وتیشی: ئەگەر حکومەت هاوکارم بێت لە داهاتوودا دەتوانم پرۆژەکەم فراوانتر بکەم و هەلی کاریش بۆ هاوڵاتیان بڕەخسێنم و پشت بە کاڵای ناوخۆیش ببەستین لەبری کاڵای وڵاتانی دراوسێ‌.

 

 

ش.ف

 

ئەوەی زیاتر خوێندراوە


-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin