Smiley face
Smiley face
Smiley face

سۆران، سێ ژن کوژراون و سیانی دیکەش خۆیان سوتاندووە

2018-05-21 09:38:36



ڕۆژنیوز- زاهیر ئیبراهیم

 

تەنیا لە چوار مانگدا، لە سنووری شارۆچکەی سۆران سێ ژن کوژراون و سێ ژن-یش خۆیان سوتاندووە، کە دوانیان گیانیان لەدەستداوە، دەیان حەڵەتی توندوتیژیی دیکەش تۆمارکراون.

 

بەپێی ئاماری بەڕێوەبەرایەتی بەرەنگاربوونەوەی توندوتیژیی دژ بە ئافرەتان لە شارۆچکەی سۆران-ی سەر بە پارێزگای هەولێر لە ماوەی چوارمانگی ڕابردوودا سێ حاڵەتی کوشتن و 11 حاڵەتی ئەشکەنجەدان و 1 حاڵەتی  دەستدرێژی سێکسیی و 3 حاڵەتی خۆسوتاندن هەبووە، کە دوانیان بەهۆی زۆری ڕێژەی سوتانەکەیانەوە گیانیان لەدەستداوە.

 

هەروەها 10 حاڵەتی داڵدەدانی ژنانی هەڕەشەلێکراو هەبووە وچارەسەری کێشەکانیان کراوە،31 سکاڵاش لەلایەن ژنانەوە دژ بە کەسوکاریان تۆمارکراوە.

 

سەبارەت بە هۆکاری بەردەوامیی و زیادبوونی توندوتیژیی دژ بە ژنان، کوردستان ئەسعەد، چالاکوان لە ڕێکخراوی کۆمەڵەی ئافرەتانی کوردستان بە ڕۆژنیوزی وت:"توندوتیژیی دژ بە ژنان لە گشت شار و شارۆچکەکانی هەرێمی کوردستان ڕەگی داکوتاوە، ناکرێت تەنیا بواری ژیان و گوزەران بکەینە هۆکاری سەرەکیی، بەڵکو هۆکاری تر ڕێگەخۆشکەرە ئەویش پرسی یاسا و سیستمە".

 

 

ئەو چالاکوانە، وتیشی"توندوتیژییەکان زۆر لەوەزیاترن کە لە ئامارەکان باس دەکرێن، چونکە هەموو ژنێک ئامادەنییە کێشەی بباتە بەڕێوەبەرایەتییەکان".

 

کوردستان، وتیشی:"کاتی ئەوە هاتووە چاو بە یاسای بەرنگاربوونەوەی توندوتیژیی خێزانییدا بخشێندرێتەوە، چونکە ئەم یاسایە نەیتوانی توندوتیژیی نەهێڵێت".

 

هەروەها، عەلی شەریف، یاساناس و دانیشتووی شارۆچکەی سۆران پێی وایە  یاسا وەک خۆی کێشەی تێدانیە، بەڵام کێشە لە جێبەجێ نەکردنیەتی و دەڵێت:"دۆخی ئابووریی و ململانێی سیاسیی و تەکنەلۆژیا لەپشت زیادبوونی حاڵەتەکانی کوشتن و خۆسوتاندنی ژنانانەوەن، چونکە قەیرانەکان دۆخی کۆمەڵایەتییان خستووەتە ژێر بارێکیت خراپ و بەگشتیی تاوانەکان زیادیان کردووە".

 

 

ئەو یاساناسە وتیشی:"دەبێت دەسەڵاتی دادوەریی ڕۆڵی پێویست ببینێت بۆ ئەوەی جێبەجێ کردنی یاسا ببێتە هۆکارێک بۆ کەمکردنەوەی توندوتیژی و بە سزاگەیاندنی تاوانباران، چونکە هەرچی بوترێت لەسەر هۆکار و پاڵنەرەکان ئەگەر یاسا کاری پێویست نەکات هیچ لە دۆخەکە ناگۆڕێت".

 

لە بارەی زیادبوون یان کەمبوونەوەی توندوتیژیی لە ئەمساڵدا بەراورد بە ساڵی ڕابردوو، شێروان خالید، وتەبێژی بەرێوەبەرایەتی بەرنگاربوونەوەی توندوتیژیی دژ بە ژنان بە ڕۆژنیوزی وت:"لەئێستادا ناتوانین هیچ بەراوردێک بکەین، چونکە تائێستا لە نیوەی ساڵداین، بەڵام بەگشتی پەڕاوی لێکۆڵینەوە بۆ سەرجەم حاڵەتەکانی توندوتیژی لە بەڕێوەبەرایەتیەکەدا کراوەتەوە و لێکۆڵینەوەش لە ڕووداوەکان بەردەوامە".

 

 

وتیشی:"تائێستا چەندین کەس لەسەر ئەو ڕووداوانە لەلایەن پۆلیسەوە لێکۆڵینەوەیان لەگەڵ کراوە".

 

لەلایەکی تر ڕۆژنیوز زانیویەتی لە سۆران دیاردەی حەب خواردن لەلایەن ئەو ژنانەی ڕووبەڕووی هەڕەشە وفشاری خێزانەکانیان بوونەتەوە و بەردەوامە.

 

بۆ بینی دەقی یاسای بەرنگاربوونەوەی توندوتیژیی خێزانیی لێرە کلیک بکە

 

 

ش.ف

 

ئەوەی زیاتر خوێندراوە


-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin