Smiley face
Smiley face
Smiley face

هۆکاری نەمانی درامای کوردی لە دیدیی هونەرمەندان و کەناڵەکانەوە

2018-05-23 10:57:34



ڕۆژنیوز ـ سەمیرا شەهابی

 

هونەر و درامای کوردی وەک دارێکی وەرزی پایزی لێهاتووە، کە سات لە دوای سات گەڵاکانی زیاتر هەڵدەورێت، کە دراما بیانییەکان هۆکاریی سەرەکیین، ئەکتەران و دەرهێنەر و کەناڵەکانیش هۆکارەکەی بۆ چەند بابەتێکی جیاواز دەگێڕنەوە.

 

لە ساڵانی ڕابردوودا هەموو خێزانەکان لە چاوڕوانی شاشەی تەلەفزیۆنە کوردییەکاندا بوون بۆ بینینی درامای نوێی کوردی، بەتایبەتتر لە مانگی ڕەمەزاندا، بەڵام ئێستا هیچ درامایاکی نوێ پەخش ناکرێت، دەربارەی هۆکارو چارەسەرییەکان، ئەکتەر، دەرهێنەر، بەرپرسانی ڕۆشنبیریی و ئەو کەناڵانەی درامای تورکی پەخش دەکەن، بۆ ڕۆژنیوز دەدوێن.

 

عەبدولی حەمە جوان، یەکێک لە ئەکتەرە دیارەکانی باشوری کوردستانە، کە ساڵانێکی زۆرە کاری نواندن دەکات، لەو بارەیەوە دەڵێت: بایەخ پێنەدان بە هونەر و پەراوێزخستنی بەشێکە لە کاڵبوونەوەی دراما، قۆناغێک هەبوو کە دراما هەنگاوی دەنا بەڵام ئەوەشی نەما، بۆیە ئەو دام و دەزگایانەی کە بەرپرسن وەزارەتی ڕۆشنبیری و هەموو کەناڵەکان کە خۆیان گرنگی بدەن بە هونەر و ببنە سپۆنسەر.

 

 

دەشلێت: ئێمە ناڵێین درامای بیانی هیچ بایەخی پێنەدرێت، بەڵکو با سنوورێکی هەبێت، چونکە بە ڕاستی خەڵک دەناڵێنێ به دەست درامای تورکییەوە و لە گەڵ کەلتوری ئێمە ناگونجێت، کۆمەڵگا بەرەو ئاقارێکی خراپ دەبات و بە ناڕاستەوخۆ لە دۆزی کورد دەدات.

 

بابەکر دڕەیی، بەڕێوەبەری ڕۆشنبیریی سلێمانی، هۆکاریی نەبوونی درامای کوردی گەڕاندەوە بۆ نەبوونی بودجە و وتیشی: لە ناو خودی هونەرمەندانیش نووسەری باشی یان سیناریۆنووسمان نییە، ئێمە لەو بوارە لە دواوەین، هەروەها تەلەفزیۆنەکانی کوردستان، تەلەفزیۆنی حزبین و بایەخ دەدەن بە دراما بیانییەکانی بەدەر لە کلتوری خۆمان، کە ئەمەش کەمووکورتییەکی گەورەیە.

 

 

بۆ چارەسەریش دەڵێت، کە دەبێت کارەکان بکرێنە کەرتی تایبەت و لە حکومەت دووربخرێنەوە، کۆمپانیاکان خۆیان هەوڵ بدەن بۆ ئەوەی درامای کوردی بەرهەم بهێنرێت و دەشڵێت: ئێمە هەوڵی خۆمان دا بۆ ڕاگرتنی درامای تورکی، بەڵام جگە لە کەناڵی کوردسات هیچ کەناڵێک درامای تورکی ڕانەگرت، ئێمەش ناتوانین بە تەواوی قەدەغەی بکەین، چونکە خۆمان بەرهەممان نییە و ناشتوانین ڕکابەریی دەوڵەتانی دیکە بکەین.

 

هەروەها گەزیزە عومەر-ی دەرهێنەر بەشێک لە قسەکانی بەڕێوەنەریی ڕۆشنبیریی سلێمانی ڕەتکردەوەو وتی: ئێمە داوا دەکەین لە هەموو لایەنێک و بەرپرسانی کەناڵەکان کە خەمخۆرانە بیربکەنەوە و پاساوی نەبوونی ئەکتەری باش و لاوازیی سیناریۆ نەهێننەوە، بە ڕاستی کەمووکوڕییەکان دەبێتە هۆی زیان گەیاندن بە بینەر و هونەرمەندان کە لە گێژاوێکدا دەژین نازانن بەرەو کوێ بڕۆن، هونەرمەندان وایان لێهاتووە کە ئەڵێن هەر فیلمێک بێت بەشدار دەبین، کە ئەمەش کارەساتە بۆ هونەرمەندی کورد کە نەزانێ ئەو دراما لە چ ئاستێکدایە و بەشداربێت.

 

 

وتیشی: درامای کوردی بەم ئاقارە بڕوات بە ڕاستی هیچ ئاسۆیەکی تێدا بە دیناکرێت لە هیچ ڕوویەکەوە، لە ڕووی سیناریۆ بێت، دەرهێنان، نواندن و زەمینەی کارکردن، سەرچاوەکەشی ئەوەیە کە لایەنە پەیوەندیدارەکان کەناڵەکان هیچ خەمیان نییە کە درامای کوردی لە چ ئاستێکدایە، کاتێک کە دەسەڵات هەستی پێنەکات و بەرهەمهێنان نەبێتە خەمی تاکی کورد، کارەکان لاواز و کەمن کە بووەتە هۆکاری پاشکەوتنی.

 

بۆ چارەسەریی دۆخەکە گەزیزەی دەرهێنەر وتی: چارەسەریی ئەم دۆخەش بە هونەرمەند ناکرێت، بە گیرفان و بە پارە و فۆند و دەسەڵات دەکرێت، تەلەفزیۆنەکان لە خەمی پەیامی دراما بیانییەکان نین بەڵکو لە خەمی کاتدان، ئەو درامایانە وەک ئەو خواردنانەن کە ژەهریان تێدایە و خەڵک بەرەبەرە دەکوژن.

 

لەسەر هەوڵەکانی ئەوان بۆ چارەسەرکردنیی دۆخەکە وتی: ئێمە زۆر قسەمان لە سەر بەرهەمهێنانی درامای کوردییەوە لە گەڵ تەلەفزیۆنەکان کردووە، بەڵام نایکەن، چونکە لە ڕووە بازرگانییەکەوە بۆی دەڕوانن نەک بەرژەوەندیی، بەداخیشەوە ئاستی درامای کوردی بریندارە و تا بڕوات خراپتر دەبێت، وەزارەتی ڕۆشنبیری هاوکاریی کردووین، بەڵام پەخشکردن لە دەسەڵاتی ئەودا نییە، بەداخیشەوە حزبایەتی داچۆڕاوەتە ناو هەموو جومگەکانی سیاسی و ئیداری و ڕاگەیاندنەکان، بۆیە بۆ بەرهەمێ باش دەبێت وەزارەتی ڕۆشنبیری لیژنەی تایبەتی هەبێت بۆ درامای کوردیی و خەرجییەکانی بگرێتە ئەستۆ.

 

هەروەها زاهیر ئیبراهیم بەڕێوبەری بەشی بەرهەمهێنانی هەرسێ کەناڵی کوردماکس، کە 'بایەخێکی زۆر بەدرامای بیانی بەگشتی و تورکی بەتایبەت دەدەن'، لەسەر پەخشنەکردنی درامای کوردی و بایەخدان بە بیانیی، وتی: ئێمە تامەزرۆین بە پەخشکردنی درامای کوردی خۆمان، بەڵام کاتێک کە بەرهەمێکی چەن زنجیرەیی دەدەن بە ئێمە تا پەخشی بکەین، لە بەر نزمی کوالێتی و لاوازیی سیناریۆکەی ناتوانین وەریبگرین.

 

وتیشێ: هەروەها خاوەن بەرهەمەکە داوای بڕە پارەیەک دەکەن کە بە قەد ساڵێکی ئێمەیە، بۆیە درامای بیانی کەمتری تێدەچێت تا لە ناوخۆیی خۆمان، ئێمە بە پەخشکردنی ئەوانە کوالیتەی کەناڵەکەشمان دێنینە خواروە.

 

لەسەر هەمان بابەت، ڕۆژنیوز پەیوەندی بە شوان عەتوف، بەڕێوەبەریی کەناڵی ئێن ئاڕ تی٢-وەوەکرد، ناوبراو بە پاساویی ڕوماڵنەکردنی کارەکانی خۆی، ئامادەنەبوو لەسەر بابەتەکە هیچ لیدوانێک بدات.

 

س.ح

ئەوەی زیاتر خوێندراوە


-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin