Smiley face
Smiley face
Smiley face

کتێبخانەیەک تەمەنی زیاتر لە نیوسەدەیە و کەمترین خوێنەری هەیە

2018-05-27 03:19:35



ڕۆژنیوز ـ هاوڕێ و بۆتان

 

کتێبخانەی گشتیی کفریی زیاتر لە نیوسەدە تەمەنی هەیە و دەیان هەزار کتێب وسەرچاوەی بەنرخی تێدایە، بەڵام کەمترین خوێنەر ڕووی تێدەکات.

 

کتێبخانەی گشتیی کفریی، لە شارۆچکەی کفریی سەر بە ئیدارەی گەرمیان، ساڵی ١٩٦٣ لەلایەن حکومەتی ئەوکاتی عێراقەوە دروستکراوە و دواتر لە ساڵی ٢٠٠٧ لەلایەن حکومەتی هەرێمی کوردستانەوە نۆژەن کراوەتەوە.

 

 

لە کتێبخانەی گشتیی کفری، زیاتر لە ١٩ هەزار و ٥٠٠ کتێب و سەرچاوە هەیە بە زمانەکانی کوردیی، عەرەبیی و ئینگلیزیی لەبوارەکانی زانستی گشتیی، سیاسەت، ئاین، ڕێزمان، فەلسەفە و ئەدەب و چەندین بواری دیکە.

 

 

 لە سەدەی ڕابردوودا بەهۆی هەبوونی سەرچاوەی باش و گرنگ، زۆربەی خوێنەرانی سنوورەکە ڕوویان تێکردووە و سودیان لە سەرچاوەکان وەرگرتووە، بەڵام ئەوەی جێگای نیگەرانیی سەرپەرشتیارانی کتێبخانەکەیە، لەدوای لەناوچوونی ڕژێمی بەعسی عێراق لە ساڵی ٢٠٠٣ کەمترین خوێنەر ڕوو لە کتێبخانەکە دەکەن، بەڕادەیەک لە مانگێکدا نزیکەی ٣٠ کەس سەردانی دەکەن، ئەوانیش خوێندکارانن و بۆ ئامادەکردنی توێژینەوە و ڕاپۆرتەکانیان سود لەو سەرچاوانە وەردەگرن.

 

 

بازیان سابیر، بەڕێوەبەری کتێبخانەى گشتیى کفریی، هۆکاری کەمبوونەوەی خوێنەری لە شارۆچکەکە گەڕاندەوە بۆ پێشکەوتنی تەکنەلۆژیا و سەرقاڵبوونیی گەنجان بە تۆڕە کۆمەڵایەتییەکان و دەستکەوتنی کتێبی ئەلیکترۆنیی.

 

 

وتیشی: بەشێک لە کتێبەکانمان ساڵانێکی زۆرە جێبەجێ نەکراون، چونکە ناخوێندرێنەوە.

 

 

بازیان، بانگەوازیی لە هاوڵاتیانی کفریی و تایبەت گەنجان کرد، کە بۆئەوەی ببینە خاوەن کۆمەڵگەیەکی تەندروست، ڕوو لە خویندنەوەی کتێب بکەن.

 

کتێبخانەی گشتیی کفری، بینایەکی گەورەی هەیە، بەڵام بەشی سەرەوەی بیناکە و هۆڵەکانی خوارەوەی بە بڕیاری وەزارەتی خوێندنی باڵا و وەزارەتی ڕۆشنبیریی حکومەتی هەرێمی کوردستان، دراون بە کۆلێژی کشتوکاڵ-ی زانکۆی گەرمیان، ئەمەش ڕێگرە لە ئەنجامدانی چلاکیی هونەریی و ئەدەبیی لەناو کتێبخانەکەدا، بۆ ئەوەی لەو ڕێگایەوە گەنجان هان بدرین بۆ خوێندنەوە و ئاشناکردنیان بە کتێبخانەکە.

 

 

جگە لە کتێبخانەى گشتیى، لە شارۆچکەی کفریی دوو کتێبخانەى تر هەن، دانەیەکیان لە قاوەخانەى شار و ئەوی دیکەیان لە گەلەریی شێوەکارانى کفریی لەلایەن نووسەران و ڕۆشنبیرانەوە کراونەتەوە.

 

 

ش.ف

 

ئەوەی زیاتر خوێندراوە


-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin